Un home foi detido na cidade de Vigo como presunto responsable de tres roubos con forza cometidos en vivendas do barrio de Teis, ás que chegou a entrar en momentos nos que os seus inquilinos se atopaban no interior.

Segundo informou este luns a Policía Nacional de Vigo-Redondela, os asaltos producíronse a finais do mes de febreiro en vivendas situadas na mesma zona. Tras as denuncias presentadas, as investigacións lograron identificar o suposto resposnable destes roubos, que chegou a ser visto no interior dos pisos polos seus ocupantes.

O individuo lograba entrar nas vivendas a través de xanelas ou portas que se atopaban abertas ou eran fáciles de manipular. Unha vez dentro, subtraía diñeiro e equipos informáticos, ademais de provocar “pequenos danos”.