A conselleira de Infraestruturas e Mobilidad, Ethel Vázquez, asegurou este martes que as obras de conexión da autovía Tui-A Guarda coa A-55 e o polígono de Areas alcanzaron xa o 55% de execución, polo que estarán terminadas a finais de verán.
Tal como indicou Vázquez nunha visita nos traballos da devandita infraestrutura, trátase dunha actuación “complexa” e isto quedou reflectido no seu “elevado orzamento”, que se viu incrementado en case 10 millóns de euros pola crise dos materiais e de subministracións, alcanzando os 30 millóns.
Segundo recolle o Goberno galego nun comunicado, a titular de Mobilidade puxo en valor a importancia funcional desta conexión, de 630 metros de lonxitude, que permitirá conectar directamente, a través dunha vía de alta capacidade, toda a comarca coa autovía que une Vigo con Portugal.
Tras os “atascos iniciais”, derivados das autorizacións ministeriais, da pandemia ou da crise dos materiais, Vázquez destacou que xa se executaron practicamente todas as demolicións e xa está “moi avanzado” o movemento de terras. Para ela, esta infraestrutura permitirá dinamizar o parque empresarial de Areas, que conta con 30 empresas e máis de 7.500 postos de traballo.
