A presidenta do Eixo Atlántico e alcaldesa de Lugo, Lara Méndez, e o vicepresidente, Ricardo Río, enviaron unha carta á ministra de Transportes, Mobilidade e Axenda Urbana, Raquel Sánchez, para pedir a licitación do tramo pendente do saída sur de Vigo.
E é que falta por licitar a metade do tramo Vigo-fronteira portuguesa, imprescindible para conseguir o obxectivo de conectar Ferrol-A Coruña-Lisboa a través dunha liña de alta velocidade en 2030.
Ademais, demándase información sobre o tramo Ferrol-Betanzos-A Coruña, tramo que falta da liña entre Ferrol e a fronteira portuguesa, aprobado hai dúas décadas e aínda sen finalizar, así como o tramo que tamén se conectaría coa rede europea a través de Lugo.
O Eixo remarca que son obras “de carácter urxente para as que existe financiamento europeo nun momento no que se está cuestionando a capacidade de xestión dos fondos Next Generation, que poderían estar en risco”.
O secretario xeral do Eixo Atlántico, Xoán Vázquez Mao, asegura que: “Isto podería provocar o absurdo de que non se faga todo o necesario por falta de financiamento mentres se devolve o diñeiro a Europa por falta de xestión”.
“Todo iso mentres o Goberno está a impulsar a próxima apertura da liña de alta velocidade Barcelona-Lyon, o que evidencia unha asimetría no trato a Galicia e Portugal comparado co trato ao Mediterráneo”, lamenta Mao.
