A unidade de Oncoloxía Radioterápica do Hospital Meixoeiro de Vigo realizou a súa primeira intervención de braquiterapia de esófago, converténdose no primeiro centro galego en realizar esta técnica en neoplasia de esófago.

Tal como explicou a Xunta nun comunicado, a realización deste procedemento foi posible grazas á colaboración dun equipo multidisciplinar, así como á nova dotación tecnolóxica, que incorpora numerosas novidades diagnósticas e terapéuticas, empregando un endoscopio de última xeración, así como innovadores sistemas de visualización, simulación e planificación 3D.

“As características desta técnica de braquiterapia ‘intraluminal’ fai posible que sexa un tratamento eficiente e con claros beneficios en tumores de esófago xa irradiados ou localizados de forma moi superficial e tamén en pacientes que teñen contraindicadas outro tipo de terapias”, indicou o xefe da unidade, Víctor Muñoz.

Segundo el, isto ofrece grandes vantaxes fronte a outros tratamentos, como a posibilidade de realizarse en poucas sesións, de 3 a 6 dependendo do caso, unha maior facilidade para administrar o tratamento de forma localizada e unha eficacia situada entre o 60% e o 100% de control da enfermidade.

A endoscopista do servizo de Dixestivo do Hospital Álvaro Cunqueiro, Nereida Fernández, foi a encargada de dirixir a intervención, na que participaron especialistas de Oncoloxía Radioterápica, Radiofísica e Pneumoloxía, sendo asistida polos equipos de Enfermaría de Dixestivo e de Oncoloxía Radioterápica, así como polos Técnicos superiores de Radioterapia.

A braquiterapia é un tipo de radioterapia interna na que se coloca unha fonte de material radioactivo directamente en contacto ou dentro do tumor a tratar, o que permite un maior control tumoral e menos prexuízos para os órganos sans.