No seu terceiro día de folga, o persoal de ambulancias galego realizou concentracións nos hospitais de referencia, incluído o Hospital Álvaro Cunqueiro, nas que esixiu a patronal a negociación dun novo convenio colectivo.

Entre outras demandas, Xesús Pastoriza, responsable de Transportes do sindicato CIG, vén de denunciar que as empresas están a utilizar os contratos en prácticas “para cubrir os cadros de persoal de maneira barata”.

“Os traballadores/as con estes contratos cobran un 60% do salario durante o primeiro ano e o 75% no segundo, pero traballan o 100% da xornada como calquera dos seus compañeiros e compañeiras. Esta situación haina que controlar”, asevera.

Sobre a sobrecarga de traballo, considera que “queda demostrada polo feito de que hai empresas que rexistran até un 13% de baixas anuais do persoal por lesións derivadas do seu traballo, e estamos falando dun sector cun media de idade que non chega aos corenta anos”.

Incluso chegou a asegurar que as empresas non cumpren as medidas básicas de hixiene das ambulancias ou da limpeza da roupa de traballo, polo que xa teñen presentado denuncias.

Pastoriza destacou tamén o amplo seguimento que está a ter a folga, tendo en conta os “abusivos servizos mínimos impostos por Sanidade, que obrigan a acudir a traballar ao 75% do persoal”.

Neste senso, Xesús Pastoriza acusa a Xunta de ser a primeira culpable “porque consentiu en adxudicar contratos a empresas que presentaron ofertas por debaixo de convenio e que agora pretenden trasladar o custe do servizo ao seu persoal”. De non producírense avances, prevén dous días máis de folga para o mes de xullo e folga indefinida a partir de setembro.