Un home, F.L.O. de Vigo e 31 anos de idade, foi detido en Vigo na madrugada do pasado luns tras agredir á súa parella, que foi atopada tirada na rúa coa cara ensanguentada. Tal como informou a Policía Local, os feitos ocorreron sobre as 02,10 horas, cando os axentes recibiron unha chamada alertando da existencia dunha muller tirada na intersección da rúa Urzaiz con Estremadura coa cara ensanguentada.

Unha vez no lugar, os funcionarios entrevistáronse coa vítima, que indicou que saíra a tomar algo coa súa parella e ao volver a casa tiveran unha forte discusión, durante a cal o agora detido a golpeara, provocándolle lesións na cara e nos brazos. Ademais, segundo o seu relato, nun momento de distracción do individuo, ela foi capaz de escapar da vivenda.

Tras ser atendida polos servizos sanitarios, que a trasladaron ao hospital Álvaro Cunqueiro, os axentes acudiron ao piso da parella, quen recoñeceu ter unha discusión coa muller, durante a cal se chegaron a agredir “mutuamente”. Por iso, foi detido como presunto autor dun delito de violencia de xénero.