O arranque da construción de dous apartados de emerxencia, un por cada sentido de circulación, no punto quilométrico 1+500 do tramo da autoestrada AP-9 que dá acceso á cidade de Vigo obrigará a cortar o tráfico a partir da medianoite deste domingo a luns.

Así o informa o Ministerio de Transportes, Mobilidade e Axenda Urbana (Mitma) nun comunicado, no que precisa que a afectación á circulación se producirá desde as 00,00 ata as 6,00 do luns, mentres que o resto de días –do luns ao venres– serán entre as 22,00 da noite e as 6,00 da mañá.

Ademais da construción dos apartados, Mitma asumirá outra serie de actuacións complementarias de seguridade viaria na AP-9, como a instalación de pórticos de información variable e medidas de control de tráfico. Esta intervención, asegura o Ministerio, “mellorará a seguridade viaria e o nivel de servizo en hora punta neste tramo”.