A tarifa do autobús urbano de Vigo subirá en 5 céntimos ata 1,40 euros desde o 1 de xaneiro de 2022, pero manterase sen cambios para usuarios con cartóns de desconto ao asumir o incremento o Concello. Nunha rolda de prensa celebrada este xoves en Vigo, o alcalde, Abel Caballero, rexeitou estimar o custo que suporá para o Concello asumir o incremento da tarifa para usuarios con cartóns de descontos ou a exención de pago para os colectivos para os que se establece a gratuidade do servizo ao insistir no impacto da evolución da pandemia dificulta estimar o volume de pasaxeiros.

“Dadas as circunstancias nas que estamos é necesario facer reconsideración do prezo do autobús urbano en Vigo”, sinalou o alcalde, que apuntou que “os datos que constan nos pregos (de contratación) indican que hai que facer subida do prezo a 1,40 euros”. Aínda que sinalou que a empresa “pedía moito máis”, concretou que, finalmente, “axustouse a petición” e decidiuse aplicar unha subida de 5 céntimos na tarifa, que pasará de 1,35 euros a 1,40.

No entanto, Abel Caballero afirmou que o incremento non afectará o custo do servizo para os usuarios do cartón Pass Vigo e os que conten con descontos sociais ou por ser estudantes. Así mesmo, manterase a gratuitade do transporte urbano para os pensionistas e os usuarios de cadeiras de rodas e os seus acompañantes.