O alcalde de Vigo, Abel Caballero, urxiu a presentación “de forma inmediata” dun plan de “recuperación” e “salvación” do sector naval da cidade á Xunta, así como que concrete “cantos recursos vaille a dedicar”.
Nunha rolda de prensa celebrada este xoves na urbe olívica, o rexedor advertiu do “serio problema” que presenta o naval vigués e puxo o foco no “risco importantísimo que paira sobre H.J. Barreras” despois de que este estaleiro comunicase a contratación dunha consultora para “buscar alternativas que garantan a súa viabilidade” e o buque ‘Evrima’ fose trasladado a Santander para traballos de pintura.
Ante esta situación, o alcalde defendeu que “quen ten que presentar un plan de recuperación e salvación” do sector naval “é a Xunta” e incidiu na necesidade de que o entregue “de forma inmediata”. “Eu esíxolle á Xunta que, de forma inmediata, presente un plan de recuperación do naval de Vigo, que o fale co Goberno de España e apoiarémolo“, garantiu.
Neste sentido, criticou que o Goberno galego “esconda” o Estatuto de Autonomía “cando se trata das súas obrigacións”, xa que remarcou que ten competencias en materia industrial.
Precisamente, o rexedor puxo o foco en que o presidente galego, Alberto Núñez Feijóo, participou este mércores na inauguración do Salón do Automóbil na cidade olívica, polo que “puido achegarse a Barreras” e “preguntar” cal era a súa situación.
No entanto, reprobou que Feijóo, o vicepresidente económico, Francisco Conde, e o director xeral de Industria, Ángel Bernardo Tahoces, “non pisen” Barreras, que, na súa opinión, parece que “deixase de existir para a Xunta”, mentres o presidente galego “sacaba fotos todos os días” cando a pasada década apadriñou entrada da filial de Pemex, PMI, no accionariado.
CIDADE DA XUSTIZA
Por outra banda, considerou “insuficientes” as prazas de aparcadoiro das que se dotará á futura Cidade da Xustiza de Vigo –306 para vehículos e 119 para motocicletas– e acusou ao Goberno galego de “atrasar” a obra, que se prevé que conclúa este outono, para “espaciar” o abono do importe da mesma durante varios exercicios.
“Preocúpame que leven xa dous anos de atraso, que é duplicar o tempo previsto”, aseverou o alcalde, que censurou que “con iso crean que saldan a débeda multimillonaria”, que, ao seu xuízo, contraeu o Executivo autonómico coa cidade.
Noutra orde de cousas, Abel Caballero asegurou que este martes a Xunta “ocupou O Berbés sen pedir permiso” para celebrar o acto de presentación do novo albergue de peregrinos de Vigo.
No entanto, a delegada territorial do Goberno galego, Marta Fernández-Tapias, asegurou que se comunicou e solicitouse permiso ao Concello para a celebración do evento, ao que lembrou que asistiron os concelleiros Carlos López Font e María José Caride.
