InicioPolíticaRubén Pérez (EU): "Hai que consolidar espazos fronte a eclosión da extrema...

Rubén Pérez (EU): “Hai que consolidar espazos fronte a eclosión da extrema dereita”

Critica o "proceso de dopaxe electoral" que se viviu na cidade cando Caballero revalidou a súa maioría absoluta no Concello de Vigo.

PUBLICADO O

- Advertisement -

O novo responsable de Política Municipal en Esquerda Unida (EU), Rubén Pérez, sinalou a necesidade de que a formación consolide espazos municipalistas “máis aló das siglas” coas que se presente ás eleccións nun momento no que se produce unha “eclosión da extrema dereita” e ante uns próximos meses “de política moi perigosa para a democracia”. Nunha entrevista concedida a RNE, recollida por Europa Press, remarcou a importancia de “consolidar a presenza política” da formación, “máis aló de se as siglas levan EU ou non”.”Non estamos aquí para defender siglas, senón para defender espazos políticos acertados”, aseverou Pérez.

Así mesmo, defendeu a aposta pola “unidade popular” independentemente dos seus resultados e lembrou que “a fórmula orixinaria das mareas municipalistas funcionou ben nos concellos porque (os seus integrantes) soubéronse centrar no conflito concreto”. Así, desligou as plataformas creadas a nivel local do “desastre” que supuxo o espazo político de En Marea na Cámara galega, o que relacionou co feito de que “se impostou de maneira fraudulenta un espazo bo e moi ben xestionado que foron as mareas municipalistas”.

O tamén secretario de Organización de Esquerda Unida puxo en valor que EU represente a terceira forza do ámbito local a nivel estatal e avanzou que esta formación apostará por reforzar o municipalismo. Tamén incidiu na importancia de que os concellos xestionen o 33% dos fondos públicos e destacou a resposta achegada polos mesmos “para resolver os problemas dos veciños” ante a crise derivada da pandemia.

Rubén Pérez, que exerce como concelleiro de Marea de Vigo na cidade olívica, advertiu ademais de que o PSOE deberá decidir o seu modelo a nivel local entre o do alcalde de Valladolid, Óscar Puente, que gobernou con EU e apostou por unha remunicipalización de servizos, ou o do rexedor olívico e presidente da Federación de Municipios e Provincias (FEMP), Abel Caballero.

CRÍTICAS A ABEL CABALLERO

Precisamente, criticou que Abel Caballero presentase unha proposta sobre os remanentes ao Ministerio de Facenda que finalmente foi “derrotada no Congreso” a pesar de que “toda a FEMP lle dixo que non estaba de acordo”. Ademais, afirmou que nas últimas eleccións municipais, cando Caballero revalidou a súa maioría absoluta á fronte do Concello de Vigo, na cidade viviuse “un proceso de dopaxe electoral” cun alcalde que durante o proceso “inauguraba obra pública”. Ademais, explicou que na urbe olívica “hai medios que sobreviven exclusivamente do cheque do Concello”, o que “ten consecuencias”. Por iso, mostrouse a favor dos medios de comunicación públicos.

ÚLTIMAS

Caballero pide unha reunión urxente con Xunta, Deputación, Goberno e Celta para pactar a reforma de Balaídos

O alcalde de Vigo, Abel Caballero, propuxo unha reunión este venres, día 20 de...

Un choque entre un coche e un camión provoca retencións na avenida de Beiramar, en Vigo

Un accidente de tráfico entre un turismo e un camión está a provocar retencións...

BNG critica que Sareb funcione “como unha especie de fondo voitre”

O BNG criticou este martes que a Sociedade de Xestión de Activos Procedentes da...

O Celta consegue que a RAG incorpore no diccionario “canteirán,canteirá”

O Diccionario da Real Academia Galega (RAG) incorporou "Canteirán, canteirá" como nova acepción tras...