Dúas persoas tiveron que ser trasladadas este venres ao Hospital Povisa de Vigo despois dun choque entre dous turismos ocorrido na N-550, ao seu paso polo municipio pontevedrés de Mos.
O accidente, segundo informa o 112, ocorreu sobre as 10,00 horas ao redor do punto quilométrico 152 da vía. Foi nese momento cando un particular alertou á central de emerxencias.
Seguidamente, os xestores avisaron á Garda Civil de Tráfico, á Policía Local e a efectivos de Protección Civil do municipio. Tamén foron informados os bombeiros do Baixo Miño e o servizo de mantemento da vía.
Aínda que a persoa alertante aseguraba nun principio que non había feridos, os efectivos de Protección Civil “comprobaron que era precisa a asistencia sanitaria” para unha das persoas, sinala o 112.
Deste xeito, o persoal de Urxencias Sanitarias-061 finalmente trasladou a dúas persoas ao Hospital Povisa de Vigo.
