A conselleira de Vivenda, Ánxeles Vázquez, asegurou que a Xunta deu resposta “na medida das súas posibilidades” e “non deixou desamparada” a unha familia de Vigo afectada por un desafiuzamento e defendeu os plans autonómicos de aluguer a prezo reducido, á vez que censurou que o Consistorio que dirixe o socialista Abel Caballero non se adherise ao programa de vivendas baleiras.
No pleno deste mércores, o parlamentario Antón Sánchez (Grupo Común da Esquerda) reprobou que a conselleira “bote balóns fóra” á vez que instou ao Executivo a garantir unha alternativa a esta familia que podería ser desafiuzada “ao non poder afrontar o pago do seu aluguer cos ingresos da Risga“.
Vázquez, pola súa banda, esgrimiu que a familia foi atendida no marco do programa ‘Reconduce’, “pediu o bono de aluguer social, asesoróuselles”, ata facilitarlles 225 euros ao mes durante “un ano prorrogable ata os tres”, ademais dunha “axuda inicial única de 600 euros”.
“Como a familia non foi capaz (de conseguir outra vivenda) porque non había quen os alugase, fíxose unha adxudicación por parte do IGVS”, relatou, e concretou que se pon sobre a mesa as opcións dunha vivenda en Tomiño ou na Cañiza.
“Non se deixa desamparada á familia, dáse unha resposta na medida das posibilidades e faise a través do Reconduce”, resolveu.
