A portavoz do BNG en Europa, Ana Miranda, e a deputada nacionalista Carmela González anunciaron que tanto na Eurocámara como no Parlamento de Galicia presentarán iniciativas sobre a contaminación que existe na Foz do río Miñor co obxectivo de sanear e rexenerar a zona.Segundo indicaron nun comunicado, esta contaminación xera “graves problemas ambientais” e económicos, ao provocar desde hai anos o peche do banco marisqueiro.

“A rexeneración deste espazo, que forma parte da Rede Natura debido á súa diversidade, é unha prioridade para o BNG”, defenderon Miranda e González despois de manter un encontro cos concelleiros do Bloque de Baiona (Pontevedra), Iago Pereira e Yasmina Moreira, e o responsable local de Nigrán (Pontevedra), Xabier Rodríguez.

Tras a visita á Foz do Miñor, as nacionalistas constataron a necesidade de pór en marcha un proxecto que inclúa o saneamento deste espazo natural, dos ríos e da Foz, así como a súa rexeneración ambiental.