O concello do Porriño alcanzou os 52 casos activos de COVID-19, e permanece en nivel de alerta 3, en vermello no mapa que publica a diario o Sergas, e que mostra a incidiencia acumulada de positivos polo virus.

Segundo confirmou o Concello, Sanidade confirmou que o número de casos activos nesta localidade (de pouco máis de 20.000 habitantes) é xa de 52, seis máis que 24 horas antes, de modo que O Porriño segue en “alerta vermella por quinto día consecutivo”.

O Concello mantén as restricións postas en marcha hai uns días (peche de parques infantís, peche dalgunhas instalacións municipais e prohibición de público nos eventos deportivos) e, ademais, establecerá un dispositivo especial de vixilancia para evitar aglomeracións esta fin de semana con motivo da festividade de Todos os Santos.

A Policía Local vixiará os cemiterios do Porriño para controlar o cumprimento das restricións con motivo da pandemia: as visitas están limitadas a catro persoas do mesmo grupo familiar e a unha duración máxima de 30 minutos.

Ademais, do Porriño, outros concellos da contorna de Vigo (e a propia cidade olívica) atópanse en nivel 3 de alerta, e adoptaron medidas restritivas, como Tui, Ponteareas ou Salvaterra.