O sindicato CIG-Saúde denunciou este venres “nula receptividade” da Consellería de Sanidade na “cuestión asistencial e laboral” do Hospital Povisa, co que o Sergas mantén un concerto, á vez que trasladou a súa “preocupación” por despedimentos tras ser adquirido por Centene.

A secretaria nacional de CIG-Saúde, María Xosé Abuín, criticou a “ausencia total de diálogo” coa Consellería de Sanidade coa que “despois de múltiples intentos e de presionar con mobilizacións” conseguiu, segundo explica nun comunicado, “manter unha reunión para tratar as cuestións asistenciais e laborais referidas a Povisa”.

“O argumento esgrimido polo conselleiro de Sanidade, Jesús Vázquez Almuiña, foi patético porque ante a preocupación da CIG-Saúde pola situación na que queda a atención sanitaria na área de Vigo, que incumbe a máis de 135.000 persoas, e a situación laboral do cadro de persoal só foi quen de dicir que a Consellería segue tendo un contrato con Povisa, que esta non desaparece e que o único que cambia é o accionariado”, manifestou Abuín.

En relación a iso, Abuín pregunta “se é por inxenuidade ou por incapacidade que o conselleiro dá esta resposta” porque, engadiu, “un cambio de accionariado pode cambiar todo o modelo asistencial e as condicións laborais do persoal se así o decide a empresa á marxe do que pense a Consellería de Sanidade”.

XESTIÓN PÚBLICA

Desde que transcendeu a adquisición por parte de Ribeira Saúde, da multinacional Centene, de Povisa, a CIG-Saúde defendeu, lembra, “que fose comprado (o hospital) pola Xunta para xestionalo directamente desde a sanidade pública”.

“Esta compra permitiría planificar a área sanitaria de Vigo sen interferencias dunha empresa privada que leva 40 anos condicionando o seu desenvolvemento e garantiría a asistencia sanitaria a toda a poboación con recursos públicos, en igualdade de condicións e servizos, e cun cociente mínimo de profesionais polo número de pacientes, o que garantiría a calidade asistencial”, defende esta central sindical.

ESTUDALO

A CIG tamén criticou que ante a pregunta de que medidas vai adoptar a Consellería de Sanidade para manter a calidade asistencial e o cadro de persoal, “o conselleiro limitouse a responder que xa o estudarían”. Por iso, para a CIG-Saúde “a preocupación é que os despedimentos poidan producirse pola vía da externalización, por parte de Centene, de servizos que actualmente presta Povisa”.