Atribúen ao cruceiro de Covelo financiamento e simboloxía masónicas

Maximino Fdz. Sendín, co cruceiro de Covelo

O escritor Maximino Fernández Sendín defendeu este sábado, na Casa Museo Pazo La Cruz, en Covelo, ante un grupo de persoas interesadas na cultura, entre elas o alcalde de Covelo Pablo Castelo, e a concelleira de Cultura, Mª Soidade G. Arjones, que o monumental cruceiro de Covelo alberga un boa cantidade de símbología masónica e que é “máis que probable que a persoa que o impulsou e costeou, Juan Antonio Tielas Fontán, fora masón”.

Fernández Sendín afirma contrastar os resultados da súa investigación con membros da masonería, que afirmaron que sen dúbida se trata dunha obra que contén moita simboloxía masónica e, “como é lóxico, probablemente, impulsada por un masón”.

Este cruceiro, de 1899, dedicado ao Santísimo Cristo dos Aflixidos, que preside a praza do Concello de Covelo, está considerado como un dos máis importantes de Galicia, único entre os máis de 10.000 que existen na comunidade galega.

O distintivo é que os outros cruceiros son netamente relixiosos. Con todo, o covelense conta con catro alegorías profanas no basamento, a case tamaño natural, que simbolizan a Industria, a Agricultura, as Artes e a Xustiza. Ademais de ser un dos máis monumentais, pola súa maior riqueza iconográfica.

O cruceiro de Covelo é obra do xenial mestre canteiro José Cerviño (alcumado Pepe da Pena), autor tamén do mundialmente coñecido Cruceiro de Hío, obra cume da cantería galega nesta especialidade.

DEIXAR UN COMENTARIO

Please enter your comment!
Please enter your name here