A Xunta de Galicia sinalou as “incoherencias” e os “erros importantes” que existen, ao seu xuízo, no estudo sobre o abastecemento de auga a Vigo e ao sur da provincia de Pontevedra, polo que pediu unha reunión co Ministerio de Transición Ecolóxica e o Reto Demográfico para tratar o asunto.

Neste sentido, a Consellería de Infraestruturas e Mobilidade remitiu unha carta ao secretario de Estado de Medio Ambiente, Hugo Morán Fernández, para trasladar a “inquietude e a preocupación” do Executivo autonómico sobre os resultados do estudo, que foi enviado o pasado 8 de abril pola Confederación Hidrográfica do Miño-Sil.

Neste documento, co obxectivo de garantir o abastecemento de auga, recóllense un conxunto de actuacións complementarias a realizar, entre as que se atopan unha captación de auga na confluencia dos ríos Oitavén e Verdugo; unha pequena presa augas arriba do encoro de Eiras, na canle do Oitavén; unha impulsión de auga desde o Miño ao encoro de Zamáns; e unha condución por gravidade para conectar as redes de Nigrán e Gondomar.

Na carta enviada pola Xunta ao Ministerio explícase que os técnicos de Augas de Galicia conclúen que o bombeo na confluencia dos ríos Verdugo e Oitavén é “prescindible”, “sobre todo tendo en conta que se podería conseguir unha achega equivalente, e mesmo maior, dun modo moito máis sustentable fomentando a reutilización da auga depurada para algúns usos ou evitando perdas na rede de abastecemento”.

“A confusión e a inquietude chega cando observamos incoherencias no propio documento, que certamente son moi relevantes. Non se pode entender nin comprender, tras acreditar ao longo do documento a ineficacia do transvasamento do río Verdugo e Oitavén, e tras advertilo desde Augas de Galicia, que se orcen estas obras como actuacións a realizar. Este exemplo lévanos á conclusión de que o documento contén erros importantes”, lamenta o Goberno galego.

Con respecto ao resto de actuacións previstas é “evidente”, para a Xunta, que algunha delas teñen un calado e unha gran envergadura, “e por iso chama a atención o fondo e as formas da súa confirmación, sen contar co aval social e ambiental e sen unha explicación”.

Ante este escenario de “incerteza e preocupación” e coas “incoherencias ou erros” detectados, o Goberno galego pediu ao Ministerio “un exercicio de reflexión e transparencia” sobre o contido dos documentos, así como a necesidade de que se informe do mesmo aos concellos e á Xunta.-

Por iso, solicitou unha reunión con todos os alcaldes afectados e coa Xunta de Galicia para que o Ministerio ofreza as explicacións oportunas.