O derbi galego que este sábado debían disputar os equipos de balonmán Porriño e Guardés no Municipal porriñés quedou aprazado tras detectarse seis casos de Covid-19.
Así o comunicou o Guardés nun comunicado, no que informa que o adiamento o decretou a Real Federación Española de Balonmán na mañá deste venres tras detectarse seis casos positivos deste coronavirus no seo do persoal do Mecalia.
Respecto diso, aclara que a normativa federativa establece un mínimo de cinco positivos para aprobar un adiamento. Deste xeito, tras informar o club da Louriña, a entidade guardesa solicitou formalmente o adiamento o xoves pola tarde e a federación española confirmouno á mañá seguinte.
O club puntualizou que seis xogadoras deron positivo ao longo desta semana. Todas “se atopan ben de saúde, con sintomatoloxía leve e illadas nos seus domicilios“, destaca.
Por iso, o Guardés solicitou o adiamento á Federación Española tras porse en contacto co Balonmán Porriño e o ente federativo confirmou a suspensión. Está previsto que o persoal se someta a novas probas este venres pola tarde en previsión de que poidan xurdir novos casos.
Segundo puntualica o club, a principios de semana, o Guardés detectou o primeiro dos casos, ao que seguiu un segundo. A previsión “era xogar igualmente”, engade, pero nas probas practicadas o xoves pola tarde “xurdiron catro positivos máis, o que activou inmediatamente o mecanismo para solicitar o adiamento”.
Agora ambos os clubs deben acordar a nova data para a disputa do encontro e, destacan, como “as relacións entre ambas as entidades son excelentes”, nos próximos días decidirán cando se disputará o derbi.
