O secretario xeral do PSdeG, Gonzalo Caballero, esixiulle ao presidente da Xunta que “se molle” e tome as medidas necesarias para “paliar” os danos producidos pola explosión en Tui, mediante a posta en marcha dun “plan transversal” que inclúa medidas económicas e urbanísticas.

En concreto, tras realizar unha visita á zona afectada pola explosión pirotécnica en Tui urxiu un plan que inclúa actuacións urbanísticas que permitan reconstruír as vivendas danadas, así como “todo tipo de atención” aos afectados.

“Os que perderon o seu fogar e os que teñen membros da familia hospitalizados necesitan todo tipo de atención“, recalcou Gonzalo Caballero, que estivo acompañado dunha delegación de cargos socialistas no Congreso dos Deputados, o Parlamento de Galicia, a Deputación de Pontevedra e o Concello de Tui.

O líder do PSdeG lamentou que os veciños estean a trasladar a súa “fonda preocupación” ante o feito de que as medidas que está a anunciar a Xunta sexan “insuficientes”. Ante esto, avanzou que o PSdeG reclamará tanto ao Goberno como á Xunta que adopten medidas “con carácter inmediato” e que acheguen “toda a información” sobre os feitos para que “non volva suceder” algo similar.

Así, abundou en que é urxente “dar solucións” á familia das dúas vítimas mortais, aos feridos e aos “centenares” de afectados pola perda ou destrución do seu fogar, nun contexto no que as normas urbanísticas, segundo puntualizou, “dificultan” as reconstrucións. Así mesmo, reclamou que se aclaren os motivos polos que se produciu a detonación, tanto por “transparencia” como por “tranquilidade”.

“DAR SOLUCIÓNS”

Pola súa banda, a presidenta da Deputación de Pontevedra, Carmela Silva, urxiu á Xunta e ao Goberno a que dispoñan as axudas económicas precisas para os afectados, como administracións competentes para iso.

Lembrou que a Deputación xa desprazou a seis traballadoras sociais para colaborar cos afectados e que na zona permanecen os bombeiros do Consorcio e arquitectos e enxeñeiros para avaliar o estado das vivendas.