Zona Franca e o Círculo de Empresarios de Vigo están iniciando a súa colaboración estratéxica, coa redacción dun documento definitorio das accións máis urxentes para o desenvolvemento económico da área metropolitana.

O obxectivo, desenvolver a economía do área de Vigo como centro da Eurorrexión a curto e medio prazo, e reordenar e ampliar os chans industriais existentes, así como acometer novas actuacións para o asentamento de empresas.

Son os temas que se puxeron sobre a mesa esta mañá durante a reunión mantida entre David Regades e o pleno da xunta directiva do Círculo de Empresarios. Regades quixo xa durante esta primeira reunión cos representantes empresariais, encabezados pola súa presidenta, Patricia García, concretar temas de importancia para “que Zona Franca deixe de ser un observador da economía e pase a ser un principal actor dese dinamismo que define a Vigo”.

Regades avanzou que desde Zona Franca estase estudando a posibilidade de reordenación de parte do chan industrial xa establecido “para que esa pegada de industria que temos na cidade se fortaleza e reorganice dunha forma estratéxica e tamén con iso podamos xerar novos chans ampliando os polígonos existentes”.

No transcurso da reunión, o Delegado expuxo a súa política de priorizar o traballo en catro sectores industriais: automoción, naval, pesca e téxtil. Para a automoción, avanzou que xa esta mesma semana vai asinar a compra de 3.000 metros cadrados na avenida de Balaídos que posibilitarán a unión das dúas parcelas propiedade do Consorcio, onde se vai a levantar o edificio emblemático que traerá á cidade a Business Factory Auto e onde se establecerán outras dotacións “fundamentais para o desenvolvemento da innovación no sector de automóbil”.

Para o sector naval e a pesca, Regades insistiu na idea dun centro gastronómico que poña en valor todos os produtos do mar. E para o téxtil mostrouse partidario de traballar para potenciar este sector que “debe recuperar o seu peso na provincia”.