Abel Caballero, alcalde de Vigo, denunciou este martes en rolda de prensa que a Xunta está a ofrecer aos nenos que viven lonxe do seu centro escolar, “que se cambien de colexio”, supostamente para aforrarse o servizo público de transporte en autobús desde os seus fogares.
Así, Caballero subliña que a Xunta está negando este servizo aos alumnos do colexio Paraixal de Teis, do C.E.I.P. de Mosteiro de Bembrive ou do Eduardo Pondal. “Ese é o criterio de apoio á educación da Xunta? Tamén quere aforrar custes a costa dos nenos de Vigo?”, preguntou en rolda de prensa.
Tamén subliñou que o transporte ao colexio Mosteiro de Bembrive está funcionando, mais porque o está a pagar o Concello de Vigo “cando é unha competencia da Xunta”, segundo asegurou o rexedor vigués.
De feito, destacou que “isto da Xunta con Vigo non ten precedente en ningún lugar, con ningún concello do Mundo”.