A Xunta anunciou este martes día 13 de marzo a activación da plataforma dixital para poder obter a nova autorización de acceso ás Illas Cíes para todas aquelas persoas que desexen visitar este Parque Nacional en Semana Santa.
Nun comunicado, o Goberno galego apuntou que esta autorización, de carácter “persoal e intransferible”, pode demandarse a través da web autorizacionillasatlanticas.xunta.gal, habilitada pola Axencia para a Modernización Tecnolóxica de Galicia (Amtega).
Así, sinalou que para acceder ás illas será “obrigatoria” a obtención do documento, polo que as empresas que se encargan do transporte marítimo ás illas “só poderán emitir billetes a aqueles pasaxeiros que dispoñan da preceptiva autorización de acceso” e “para ese día en concreto”.
Ademais, a Xunta explicou que o persoal da Dirección Xeral de Patrimonio Natural exercerá a función de “controlador-informador” nos portos de saída cara ás Cíes, como son Vigo, Baiona e Cangas. Por iso, asegurou que “haberá un en cada porto” e “identificado con chalecos de cor laranxa”.
Así mesmo, o Executivo dirixido por Alberto Núñez Feijóo indicou que estes efectivos contarán con “dispositivos de lectura dos códigos ‘QR” para “comprobar a validez das autorizacións”, así como cun expositor próximo aos despachos de billetes no que haberá folletos informativos a disposición dos viaxeiros que expliquen as novidades introducidas.
O obxectivo dos controladores, que se manterán “de forma continuada” entre o luns 19 de marzo e o luns 2 de abril, é “evitar que embarquen cara á illa visitantes sen a correspondente autorización administrativa”.
COMO SOLICITAR O PERMISO
Durante a solicitude do permiso, será necesario rexistrar nome, apelidos, documento de identidade, sexo e ano de nacemento. As autorizacións enviaranse por correo electrónico ao solicitante e poderán descargarse desde a propia páxina web.
Unha vez que o visitante dispoña xa da súa autorización, de carácter persoal e intransferible, dotada de códigos de control ‘QR’, número de autorización e nome e apelidos, poderá elixir a barca coa que quere desprazarse até as Cíes.
Concretamente, a Xunta anunciou que esta semana Santa as empresas Mar de Ons, Nabia e Rías Galegas son as que levarán a cabo as travesías, autorizadas pola Dirección Xeral de Mobilidade e pola Dirección Xeral de Patrimonio Natural, responsable do control dos accesos ao espazo natural.
POLÉMICA POR EXCESO DE VISITAS
En agosto de 2017, o Parque Nacional presentou senllas denuncias contra catro navieras que conectan as localidades de Vigo, Baiona e Cangas coas Illas Cíes, por supostamente trasladar ao arquipélago durante dúas xornadas a máis persoas das permitidas.
Xa en xaneiro deste ano, a Consellería de Medio Ambiente impuxo sancións por un total de 930.000 euros ao catro navieras, pola comisión de infraccións graves por “incumprir as cotas autorizadas” de visitantes, co que confirmou a súa proposta inicial de sancións e desestimou os recursos das compañías.
