O equipo de comunicación do Festival O Mariquiño vén de publicar, 12 horas despois do accidente, un comunicado sobre o acontecido na súa tráxica última xornada. Nel, lamentan profundamente o accidente da pasada noite “e solidarízanse con todos os feridos e os seus familiares, que agora mesmo son a prioridade absoluta para todos”, subliñan.

Quixeron destacar ademais “o civismo demostrado polo público, que abandonou de forma ordenada o recinto e permitiu o traballo dos equipos de rescate e seguridade, que realizaron un gran labor. Agradecemos publicamente a súa colaboración”.

Engadiron ademais que o recinto “se atopa baixo precinto xudicial, á espera dos informes dos peritos para delimitar as causas técnicas do derrube da pasarela afectada”.

Aseguran que os concertos organizados por O Marisquiño cumprían as condicións de seguridade requiridas pola lexislación. “Estamos a disposición das autoridades competentes para todo o que poidan necesitar”, conclúen.