A banda galega de rock Sineistro Total despídese dos escenarios, tras 40 anos de carreira, co seu último concerto, ‘Siniestro total, 40 anos sen pisar a Audiencia Nacional’, que terá lugar o próximo 6 de maio no Wizink Center de Madrid.
Neste sentido, os membros da banda Julián Hernández e Javier Soto, xunto co exintegrante Miguel Costas, presentaron nunha rolda de prensa os detalles da súa última actuación este mércores 23 de febreiro.
“A vida dun grupo non é soamente os escenarios. Sei que actualmente os escenarios son o único modo de financiar a música, pero con este parón de dous anos (referíndose á pandemia) e coa inercia, pérdese moito. Tiñamos reservado esta data para o corenta aniversario do grupo, e vendo que as forzas para retomalo eran moi complicadas, dixemos imos deixalo aquí, que cremos que 40 é unha cifra respectable”, expresou o vocalista do grupo.
Ademais, explicou que celebrar os 40 anos “dá unha sensación de vertixe moi potente”. “Pasamos os 27, co cal xa nos saltamos a Jimi Hendrix e Kurt Cobain, logo pasamos os 33, que é a idade de Cristo, e xa 40 é unha vertixe absolutamente insoportable”, puntualizou.
Así mesmo, confesou que “non é exactamente unha separación”. “Hai unha cousa que permanentemente dicimos, e témolo interiorizado, que é hai que retirarse a tempo. Iso non é posible, nunca vai ser a tempo. En todo caso, seguiremos facendo cousas e non nos deixaremos influír”, matiza.
Respecto das cancións que conforman o seu último concerto, explicou que “manexan unha pinza” de entre 40 e 50 cancións para “atender a todas as sensibilidades” que asistan ao evento. “Temos dous meses para colocar todo no seu sitio e que sexa o suficientemente fluído. Probablemente chegaremos ás 40, un concerto dos Rolling Stones non chega ás 20 cancións, dígoo para que haxa unha comparación de xenerosidade”, matizou entre risas.
Sobre novos proxectos, o vocalista desvelou que proximamente sairá un cancioneiro coas versións de Sinistro total. “Deixar a música vai ser moi difícil. Tocar en casa é unha cousa moi divertida, e agora que teño algún dos amplificadores que usei en directo en casa, non vexas como estou a foder aos veciños”, confesou.
O grupo decidiu non facer concertos durante a pandemia “se había que estar sentados, separados e con máscaras”. “Coñecemos moi ben á xente que vén aos nosos concertos –coma se a tivésemos parido– e sería unha batalla permanente coa seguridade para non contaxiarnos”, informou Hernández para engadir que agora que parece que se están librando diso, realizarán este último concerto.
Ao comezo do acto, o grupo de rock ‘Los enemigos’ fíxolle entrega dunha placa conmemorativa polos seus 40 anos de existencia. “Para nós é unha noticia nefasta saber que vos separades”, expresou a banda e confesaron que Sinistro Total lles apoiou desde os seus principios.
