O xulgado do Contencioso-Administrativo número 1 de Vigo rexeitou autorizar a aplicación dun tratamento compasivo con ozonoterapia a unha paciente con Covid-19, ingresada no hospital Álvaro Cunqueiro da cidade olívica.
A familia desta muller presentou ante o órgano xudicial a petición da medida cautelar, reclamando que, con urxencia, se lle permitise a aplicación deste tratamento “por estar a súa vida en grave perigo”, e por non fornecer “efectivo positivo algún” os tratamentos que lle estaban dispensando no hospital.
Na súa resolución, contra a que non cabe recurso, o xuíz sinala que a ozonoterapia “non figura nos protocolos e guías clínicas para o tratamento de pacientes de Covid-19” e lembra que o seu uso “nin está avalado pola Axencia Española dos Medicamentos, nin conta coa necesaria evidencia científica”. O maxistrado tamén destaca que tampouco se dispón “de datos contrastados sobre a súa seguridade e posibles efectos adversos”, polo que conclúe que non pode autorizarse o seu uso compasivo como medicamento.
No auto tamén indica que para ese uso sería necesaria a solicitude do médico responsable do centro hospitalario no que se atopa ingresada a paciente, o consentimento informado da enferma, o visto e prace da dirección do hospital e a conformidade do promotor do ensaio a fornecer o tratamento.
O titular do xulgado do Contencioso-administrativo número 1 de Vigo incide en que, tal e como sinala o Servizo Galego de Saúde (Sergas), o ozono “non é un tratamento, non está incluído nos protocolos de tratamento Covid, nin está aprobado polo Ministerio de Sanidade nin a Axencia Española de Medicamentos e Produtos Sanitarios”. De feito, trátase “dunha aplicación non contemplada na carteira de servizos do sistema público de saúde” e “menos aínda podería ser implementada por un facultativo -xa xubilado- alleo ao Sergas”, tal e como demanda a familia da paciente.
