O aeroporto de Vigo terá tres destinos internacionais a partir do próximo mes de noviebre e ata o 31 de decembro de 2025, tal como o anunciou o alcalde, Abel Caballero, que indicou que o concurso para a promoción turística e potenciación de actividades económicas no que traballa en Concello incluirá voos directos a Londres, Bruxelas e a unha terceira ruta internacional a elixir as compañías entre Düsseldorf (Alemaña), Ámsterdam ou Dublín.
“O obxectivo é consolidar o aeroporto de Vigo. Máis adiante tamén queremos voar a París”, reivindicou o rexedor olívico en rolda de prensa, quen explicou que a idea é que estas liñas empecen a operar o 1 de novembro.
Caballero xustificou a elección destes voos sinalando a “importancia vital” de Londres e a cantidade de vigueses que alí residen, así como de Bruxelas, que é un “eixo central” na Unión Europea. Düsseldorf e Ámsterdam pola súa importante actividade turística e por ser aeroportos de conexión con outros destinos e Dublín porque xa existiu esa ruta e “funcionou moi ben”.
“A conectividade témola con Londres e Madrid, e no seu momento terémola con París, pero queremos ofrecer o máximo de conectividade e o máximo número de viaxes de negocios e turísticos”, engadiu o alcalde.
Na actualidade, desde Peinador operan seis aerolíneas: Iberia, AirNostrum, AirEuropa, Binter, Vueling e Ryanair. Este verán haberá voos a 14 destinos diferentes: Madrid, Barcelona, Bilbao, Valencia, Gran Canaria, Tenerife, Mallorca, Sevilla, Málaga, Santander, Eivissa, Alacante, Menorca e Lanzarote.
