A Xunta de Galicia remitiu na mañá deste venres ao Concello de Vigo os 17 informes que os distintos organismos e direccións xerais do Goberno autonómico deben redactar para a aprobación do Plan Xeral de Ordenación Municipal (PXOM), 4 deles desfavorables. Tal como informou en rolda de prensa a conselleira Medio Ambiente, Territorio e Vivenda, Ángeles Vázquez, estes documentos redactáronse “en tempo e prazo”, xa que a Xunta estableceuse un máximo de 3 meses para levalos a cabo.

Dentro destes 17 informes atópanse algúns relativos a Patrimonio, Calidade Ambiental, Defensa do Monte, Mobilidad ou Emerxencias e Interior. Vázquez explicou que o único texto autonómico que está pendente é o de Augas de Galicia, xa que se pediu máis información técnica ao Concello para poder realizalo. “Cumprimos a nosa función, que é apoiar ao Concello de Vigo que ten unha importancia transcendental porque son 300.000 habitantes e é unha das economías que temos que seguir coidando e consentindo”, reivindicou a titular de Territorio.

Ángeles Vázquez explicou que agora é o goberno municipal o que ten que facer as reformulacións oportunas, xa que dos 17 informes, 4 son desfavorables e outros son favorables con condicións. Por iso, instou a que se corrixan canto antes para que a PXOM poida estar finalizado antes de maio de 2023, que é cando decae a norma provisional.

Entre as correccións necesarias, o Concello terá que corrixir algúns aspectos como o de permitir a construción de casas unifamiliares de ata catro alturas que é “incoherente” con esta tipoloxía de vivendas, sobre todo en ámbitos próximos á costa.

“Cando se corrixan os defectos seguiremos a disposición do Concello”, engadiu Vázquez, quen tamén indicou que os técnicos da Xunta tamén están dispoñibles para liquidar “no menor tempo posible” esta situación.

“MESMO TRATO” CARA Á XUNTA

Na rolda de prensa, a conselleira destacou a “celeridade” do Executivo autonómico e pediu ao goberno municipal “o mesmo trato” en relación aos permisos necesarios para a ampliación e construción de edificios de San Paio de Navia.

Nesta liña falou a delegada territorial da Xunta en Vigo, Marta Fernández-Tapias, quen subliñou que o Goberno autonómico “cumpre coa súa parte” como “sempre cumpriu” e pediu “lealdade institucional” en relación ás últimas polémicas como o instituto de Navia, que conta co “compromiso” da Xunta e respecto da autovía Vigo-O Porriño, defendida polo Executivo galego, que á súa vez ve a eliminación da peaxe da AP-9 como unha “solución inmediata”.

Fernández-Tapias tamén se referiu a a situación do novo viario que percorrería varias parroquias rurais de Vigo, destacando que é unha estrada municipal, que discorre só polo territorio vigués, e que a Xunta non pode financiar, ademais de que “non conta” co apoio dos veciños.

Neste aspecto, Vázquez explicou que os informes non valoran a conveniencia ou non do viario, senón que indican a necesidade de que o Concello busque outra fonte de financiamento que non sexa o Executivo galego.