O presidente da Federación Española de Municipios e Provincias (FEMP), Abel Caballero, reuniu este martes a un consello asesor de Sanidade conformado por 13 expertos para preparar a Conferencia de Presidentes que terá lugar este mércores e na que o presidente do Goberno, Pedro Sánchez, abordará a situación da pandemia da covid-19 cos presidentes autonómicos.

Nunha rolda de prensa celebrada en Vigo, o tamén alcalde da cidade indicou que reuniu a profesionais “de altísimo nivel”, como médicos, directores de investigación e persoas especializadas en inmunoloxía de face á súa participación na Conferencia de Presidentes en calidade de titular da FEMP. Así, explicou que busca formar unha opinión de face á sesión.

Así mesmo, volveu a pedir “sentido común” e chamou á cidadanía a “vacinarse”, xa que esta inmunización supune a “mellor arma” contra a covid-19. Tras insistir no cumprimento das normativas sanitarias na cidade, que estes días rexistra unha gran afluencia con motivo da iluminación do Nadal, recomendou reducir as reunións familiares e as ceas de empresa ante o aumento de casos.

Abel Caballero tamén destacou a súa participación na Conferencia de Presidentes e o Consello Interterritorial de Saúde e celebrou que a cidade forme parte “do núcleo que toma as decisións do conxunto de España”.