Os traballadores de Vitrasa, empresa que presta en Vigo o servizo de transporte de bus urbano, concentráronse este venres ante o Concello e ante a pinacoteca Fernández del Riego (onde estaba prevista unha visita de Abel Caballero, que finalmente non se produciu), para esixir a intervención do alcalde no conflito que lles levou a convocar unha folga desde o pasado 20 de novembro, con paros as fins de semana, e que se converterá en folga indefinida de luns a venres a partir do 13 de decembro.
O presidente do comité, Imanol Arnoso (CIG), explicou en declaracións aos medios que a concentración deste venres ten como finalidade reclamar ao goberno local e ao rexedor que se sitúen e intermedien ante a empresa que, segundo denunciou, leva un ano sen vontade de negociar e atender as súas demandas.
“Levamos un ano tentando negociar un convenio, e a empresa négase desde o minuto cero. O Concello ten algo de responsabilidade, se lle dan cada ano máis de 13 millóns á concesionaria, e este ano outros 6 millóns máis polas perdas derivadas da pandemia de Covid. Con estas cifras millonarias, o alcalde terá algo que dicir da política laboral da empresa”, proclamou.
Arnoso explicou que, aínda que inicialmente o persoal puxo sobre a mesa reclamacións económicas, ante o bloqueo da empresa, que alega que está en situación de perdas, optaron por “aparcar” esas demandas e centrarse noutras do ámbito social, como a regulación dos descansos, a redución da xornada, a revisión dos tempos das rutas, etc. Aínda así, lamentou, non avanzaron nada.
Respecto diso, lembrou que, se non hai unha solución nos próximos días, a folga farase indefinida, de luns a venres, a partir do 13 de decembro, polo que volveu a apelar ao “apoio” do alcalde. “Que lle dea un toque á empresa, que está moi a gusto nesta situación”, demandou.
CONCENTRACIÓN ANTE A PINACOTECA
Varias decenas de traballadores de Vitrasa concentráronse sobre as 11,00 horas na Praza do Rei, ante o Concello olívico, para reclamar a intervención do goberno municipal no conflito, coreando consignas como “Menos luces e máis autobuses”, e vixiados de preto por varias unidades antidisturbios da Policía Nacional.
Ante a previsión de que, a esa hora, o alcalde estaría na Pinacoteca Fernández del Riego, a poucos metros do consistorio, os folguistas desprazáronse ata alí e reuníronse fronte á porta deste centro cultural, onde ‘cantaron’ mensaxes como “Abel que pasa? Enfróntate a Vitrasa” ou “Abel reacciona, Vitrasa non funciona”. Finalmente, o rexedor non acudiu á Pinacoteca e os traballadores volveron en manifestación á Praza do Rei, escoltados pola Policía.
Na protesta participaron os concelleiros Rubén Pérez (Marea de Vigo) e Xabier Pérez Igrexas (BNG). O portavoz de Marea apuntou que o grupo Avanza, e especialmente desde que houbo cambios na propiedade, “está a degradar as condicións laborais dos seus traballadores ata rozar a ilegalidade”, e urxiu ao goberno local a abrir un expediente informativo para comprobar se a empresa vulnera os dereitos do persoal e, no seu caso, sancionala.
Pola súa banda, o concelleiro nacionalista lamentou que Abel Caballero e o seu goberno “ponse sistematicamente de lado” cando se trata das concesionarias, e criticou que o rexedor se negue a falar co persoal de Vitrasa, “el que tanto presume de falar con todo o mundo”. “Agora que os traballadores están mobilizados, opta por esconderse”, constatou, e cualificou de “incomprensible” a súa actitude de “pasteleo” coa empresa.
