O deputado do BNG no Congreso, Néstor Rego, pediu ao Goberno do Estado que priorice a conexión ferroviaria que une a cidade de Vigo co Porto. O parlamentario rexistrou iniciativas no Congreso para coñecer os compromisos alcanzados no Goberno do Estado e o executivo portugués tras o cume hispano-luso celebrada en Trujillo.
Segundo informou o Bloque nun comunicado, a formación quere saber se se tratou de forma específica esta conexión entre Galicia e o norte de Portugal e se o Executivo estatal incluirá nos orzamentos xerais do Estado (PGE) partidas suficientes para levar a cabo o novo trazado e o impulso da modernización da liña ferroviaria Vigo-O Porto.
O BNG lembra que na comparecencia ante os medios, os presidentes dos dous Estados, Pedro Sánchez e Antonio Costa, fixeron pública a súa aposta polo tren e transporte sustentable pero non anunciaron compromisos concretos de investimento nin acordos sobre prazos.
O Bloque, que sinala que o presidente de Portugal mencionou nas súas declaracións que una das prioridades en materia ferroviaria era a conexión Vigo-O Porto, crítica que Sánchez “se esquecese” de citar a conexión do Eixo Atlántico pero si nomease a conexión Madrid-Lisboa. Por este motivo, a organización frontista quere saber se durante o cume, ambos os estados trataron de forma específica nas conversacións a modernización da conexión ferroviaria, tanto de viaxeiros como de mercadorías, entre Vigo e O Porto.
Ademais, pregunta sobre se o Executivo español “rectificará e incluirá nos orzamentos partidas especificas suficientes para acometer as obras de modernización e adquisición de máquinas e vagóns mellores, así como a ampliación de frecuencias”. “A modernización da conexión ferroviaria entre Vigo e O Porto é vital por tratarse dunha infraestrutura estratéxica para a vertebración das conexións entre Galicia e o norte de Portugal“, incide o BNG.
Néstor Rego crítica que proxectos como o saída sur de Vigo, a supresión dos pasos a nivel, a mellora do trazado e a dotación con sistemas de seguridade máis avanzados continúan sen contemplarse e sen ter partidas específicas. “O trazado do Eixo Atlántico segue sen avances, sendo un proxecto prioritario para garantir o futuro económico de Galicia”, salienta.
“É imprescindible a modernización e mellora do servizo desta liña”, subliña o parlamentario do Bloque, que incide en que esta actuación debe ir acompañada tamén da integración da liña de mercadorías Vigo-O Porto en Corredor Noroeste, garantindo o acceso a fondos europeos para o seu financiamento.
