O alcalde de Vigo, Abel Caballero, censurou este venres que as organizacións sociais da cidade “dan cobertura” á Xunta, a pesar de que a administración autonómica “non fai política social” na urbe olívica.
Así o trasladou nunha rolda de prensa, na que volveu a repetir que Vigo é a cidade “con maior política social de toda España”, e incidiu en que dita política é asumida integramente polo Concello. Respecto diso, lembrou, por exemplo, que a administración local sostén o único albergue para persoas sen teito de carácter municipal que hai en Galicia.
Por contra, denunciou, a Xunta de Feijóo “non fai política social en Vigo”, e iso a pesar de que “recibe diñeiro do Goberno de España” para investir neste ámbito. “Pero en lugar de facer política social, a Xunta fai caixa co diñeiro que lle dá o Goberno. É a maior vergoña política“, repetiu.
Nese contexto, sinalou que “parece mentira” que algunhas organizacións sociais da cidade, “que se declaran de esquerdas” non recoñezan o labor do Concello nesta área. Así, pediulles “que non se alíen coa Xunta para que non dedique diñeiro a política social” e que non lle dean “cobertura”.
