A concesionaria do bus urbano de Vigo, Vitrasa, emitiu un comunicado este xoves no que volveu a lamentar a convocatoria de folga por parte do comité de persoal, e apuntou que “a principal loita” da empresa é “manter os postos de traballo” nun contexto de crise para o sector do transporte, unha problemática “acrecentada” polas restricións de aforamento establecidas pola Xunta para loitar contra a pandemia de Covid.

Así, Vitrasa, que se desculpou “polas molestias que as xornadas de paro ocasionan (as próximas serán este venres, sábado e domingo), lembrou que a pandemia provocou que o sector de transporte viaxeiros estea a atravesar “a maior crise económica vivida ata o momento” e con “unha recuperación máis lenta dos seus ingresos”.

A concesionaria recalcou que traballa “diariamente” para recuperar a mobilidade no transporte público previa á pandemia, pero esa recuperación “non está a ser fácil”. “Seguimos sufrindo os efectos da crise sanitaria, de cambios temporais de hábitos e de redución da mobilidade, acrecentada en Vigo polo mantemento das restricións nos aforamentos marcados pola Xunta”, lamentou.

Respecto diso, a empresa sinalou que esas limitacións son “das máis altas a nivel nacional”, permitindo, á marxe dos viaxeiros sentados, un terzo do aforamento nas prazas de pé, e criticou que a restrición “non conta con argumentos sanitarios” e foi eliminada “na maioría de Comunidades Autónomas”.

FOLGA

Neste contexto, criticou de novo a convocatoria da folga por parte do persoal, que atribúe a un intento de presionar da cara á negociación do próximo convenio, á vez que reiterou a súa “vontade de diálogo”.

“Os paros son medidas desproporcionadas para solicitar cuestións que deben ser analizadas e consensuadas no marco dunha negociación entre empresa e representantes dos traballadores, sen prexudicar aos cidadáns de Vigo”, indicou Vitrasa.

O comité de empresa de Vitrasa convocou catro xornadas de folga neste mes de agosto (o pasado martes, e o próximo fin de semana) para denunciar o incumprimento do convenio por parte da empresa e para reclamar melloras laborais. Este venres concentraranse pola mañá ante o Concello de Vigo dentro do calendario de protestas.