O pesqueiro de capital galego e bandeira británica ‘Manuel Laura’, cuxa tripulación é maioritariamente da zona do Morrazo, atracou na tarde deste martes no porto de Vigo, procedente de Irlanda, de onde, segundo o sindicato CIG, foi “expulsado” tras coñecerse que había un caso positivo de Covid a bordo.

O barco atracou á primeira hora da tarde na terminal viguesa, onde permanece illado, e a previsión é que toda a tripulación sexa sometida a probas PCR, dado que, á marxe do positivo confirmado, a maior parte dos 12 mariñeiros presentan síntomas compatibles coa infección, segundo explicaron fontes sanitarias e do sindicato nacionalista.

A CIG informou de que a tripulación do arrastreiro vacinouse antes de saír cara a Gran Sol e que, estando xa en plena travesía, un dos seus tripulantes comezou a sentirse indisposto. Segundo denunciou, á súa chegada ao porto irlandés de Castletownbere, as autoridades denegáronlles auxilio, a pesar de que esta obrigación se recolle no Regulamento Sanitario Internacional.

Segundo Xavier Aboi, estes mariñeiros sufriron “presións, ameazas veladas e suxestións” por parte das autoridades irlandesas, que lles aseguraron “que non había ambulancias dispoñibles nin taxis para casos de Covid”. “Negáronse a prestarlles asistencia médica e o único que conseguiron foi que unha enfermeira subise a bordo a facer unha PCR, coa que se confirmou o positivo”, sinalou.

A CIG denunciou que, finalmente, o barco “foi obrigado a abandonar o porto e iniciou o seu regreso a Galicia”, e esixiu á Xunta e ao Goberno central que investigue o ocorrido e, no seu caso, adopte medidas tras esta “chantaxe” de Irlanda.