O centro comercial Vialia Estación de Vigo, que abrirá as súas portas no próximo mes de setembro, contará cunha boleira entre as súas opcións de lecer. O centro, xestionado por Nhood e cun 90% da superficie comercializada, tamén contará coa tenda multimarca ‘NEW YORKER’, o restaurante ‘Brasa e Leña’ e a tapería galega ‘Chuliña’.

A empresa Sertronic Lecer S.L, inaugura o seu novo espazo de entretemento situado na planta alta do centro comercial que disporá de 722 metros cadrados de superficie.

A boleira contará con seis pistas de birlos profesionais Brunswick, ademais de billares, futbolíns e máquinas de habilidade de última xeración. Todas estas propostas son aptas para todas as idades e deseñadas para gozar con familiares ou amigos.

Entre as novas opcións gastronómicas, Vialia Vigo incorpora a churrasquería Brasa e Leña que estará situado na planta alta do centro comercial e contará con 278 metros cadrados.

O restaurante especializado en carnes á brasa ao estilo brasileiro denominado ‘Rodizio’ ofrecerá aos seus clientes carnes de pito, porco e tenreira asadas a lume lento con distintas guarnicións. Ademais, todos aqueles que o desexen, poderán repetir cantas veces queiran.

A tapería Chuliña aterra no centro comercial vigués para ofrecer aos seus clientes unha gran variedade de pratos típicos galegos como polbo á feira, lacón con grelos ou empanadas galegas. O restaurante estará situado na planta baixa e contará con 155 metros cadrados.