O monitor vigués de taekwondo acrobático condenado pola Audiencia Provincial de Pontevedra a 5 anos de prisión por abusar sexualmente dunha das súas alumnas, José C.S., faleceu este domingo tras precipitarse desde un cuarto piso dun edificio na rúa Pintor Laxeiro, unhas horas despois de pór no seu perfil de Facebook o último ‘post’ dunha serie de publicacións nas que reiteraba a súa inocencia e criticaba a policías, xuíces, Fiscalía e testemuñas.
José C.S. atopábase pendente de ingresar en prisión despois de que os tribunais decretasen a firmeza da súa condena. De feito, íase a iniciar o trámite por parte da acusación para solicitar a execución da sentenza.
A Audiencia condenou a este adestrador a 5 anos de cárcere por abusar sexualmente dunha alumna á que fixo tocamentos co pretexto de levar a cabo con ela exercicios de expresividade. O Tribunal Superior de Xustiza de Galicia ratificou dita pena.
Este monitor mantivera sempre a súa inocencia, e así o declarou no xuízo. Ademais, no seu perfil de Facebook tamén publicara numerosos textos negando os abusos; de feito, nas últimas semanas fixera públicas diversas cartas cargando contra xuíces, psicólogos, policías, Fiscalía ou testemuñas, baixo o epígrafe ‘Acabouse o silencio’. Horas antes de falecer, José Cid ‘colgaba’ nesta rede social un arquivo titulado ‘A miña historia’, cos textos nos que contaba a súa versión do ocorrido.
