O Concello de Vigo autorizará a realización de fogueiras na noite véspera de San Xoán, aínda que só ata medianoite e sen comida nin bebida, segundo avanzou este martes en rolda de prensa o alcalde da cidade, Abel Caballero.

Segundo explicou o rexedor olívico, o Concello dará permiso para as fogueiras, “coa aplicación estrita” das medidas de prevención indicadas pola autoridade sanitaria con motivo da pandemia de Covid. Respecto diso, sinalou que ditas medidas concretaranse cando a data se achegue.

En todo caso, explicou que a hora de finalización das celebracións será medianoite, independentemente de que, para entón, Sanidade autorice as reunións de persoas non convivientes máis aló da 1 da madrugada. Por outra banda, non se permitirá comer nin beber, e será o obrigatorio o uso de máscara e manter a distancia social.

Abel Caballero sinalou que as organizacións que soliciten permiso para as celebracións deberán superar as inspeccións habituais de seguridade, ademais de ter que cumprir os protocolos sanitarios. Así mesmo, engadiu que, “como cada ano”, a Policía Local estará “atenta” a que non haxa incidentes e, neste caso, tamén para evitar aglomeracións ou “botellóns”.