InicioCulturaAntipático, xeneroso, serio, burlón, culto, esaxerado... como foi Quevedo?

Antipático, xeneroso, serio, burlón, culto, esaxerado… como foi Quevedo?

PUBLICADO O

En 2016 botaba a andar o proxecto de investigación financiado polo Ministerio de Economía La recepción póstuma de Quevedo, co profesor da Universidade de Vigo Manuel Ángel Candelas Colodrón como investigador principal.

O obxectivo era unir especialistas internacionais nun mesmo foro para analizar a evolución da imaxe sobre o autor e a súa obra a través dos séculos, así como o seu impacto nos outros escritores posteriores.

Tras máis de dous anos de traballo, e a seis meses de que conclúa o proxecto, esta semana celébrase en Vigo o congreso Quevediana2018 coa finalidade de presentar algúns dos resultados e, ao mesmo tempo, “que outros expertos e expertas nos acheguen os seus coñecementos e estudos” sobre un dos autores máis destacados da literatura española, coñecido principalmente pola súa poética.

Ademais, como explica o profesor Candelas Colodrón, do Departamento de Literatura Española e Teoría da Literatura, “queremos aproveitar para tratar de establecer unha rede con estudos de Quevedo de todo o mundo, máis aló dos que participan no proxecto” para evitar a atomización que existe neste eido que non facilita a permeabilidade do coñecemento.

Neste simposio participan 20 especialistas de Italia, Noruega, EEUU, Suíza, Alemaña, Francia e España, concretamente das universidades de Milán, Tromsø, Cincinnati, Salerno, Nuechâtel, Heidelberg, Huelva, Nova York, Orleans, Sevilla, Alcalá, Washington, Nápoles, Lille, Córdoba, Santiago de Compostela, Autónoma de Madrid, Siena, Pisa, Jaén, Múnich e Vigo.

Quevedo, máis aló dos estereotipos

No acto inaugural do congreso, que tivo lugar na Facultade de Filoloxía e Tradución, a vicerreitora de Responsabilidade Social, Igualdade e Cooperación, Mª Isabel Doval, e o decano do centro, Luis Alonso Bacigalupe, déronlle a benvida aos participantes, animándoos a divulgar e dar a coñecer os resultados das súas investigacións para que transcendan o eido universitario.

Pola súa banda, o director do Departamento de Literatura Española e Teoría da Literatura, José Montero, remarcou a necesidade de afondar na figura de Quevedo para que a sociedade coñeza algo máis ca “un home antipático, serio, antigo, esaxerado e ao que lle gustaba burlarse”, para que poidan ver a un Quevedo “culto, influínte, xeneroso, satírico dos costumes dunha época…”.

Segundo explicaba, “pasan os séculos e a imaxe de Quevedo segue sendo a mesma, por iso son necesarias iniciativas coma esta que estuden a recepción de Quevedo a través do tempo” e que permitan velo “non só como o excelentísimo poeta e prosista que é, senón tamén que a súa imaxe transcenda os estereotipos”.

O congreso desenvólvese entre dúas sedes, esta mañá de mércores foi no campus vigués e dende esta tarde e ata o venres na sede de Afundación, en Vigo. Ao longo das tres xornadas abordaranse temas como a recepción en autores case contemporáneos a Quevedo, en forma de traducións, en particular ao italiano, en lectores do século XVIII e os problemas de censura, nas edicións modernas, en autores españois da guerra e a posguerra, como Alberti, Luis Alberto de Cuenca ou en Goytisolo.

En resumo, destaca o profesor Candelas, “en todas as épocas e en todas as ordes da literatura e incluso da historia ou o pensamento”.

O relatorio inaugural, que ía impartir Lía Schwartz, da Graduate Center of the City University of New York, sobre a tradición do quevedismo, quedou adiado por problemas de saúde da conferenciante, que intervirá de xeito virtual. Foi Samuel Fasquel, da Université d’Orléans, o encargado de abrir o simposio cunha aproximación á presencia de Tertuliano na prosa de Quevedo.

Tres anos de proxecto

O proxecto La recepción póstuma de Quevedo está coordinado pola Universidade de Vigo e nel están involucrados investigadores e investigadoras de Italia, EEUU e Galicia, como son Federica Cappelli, Università degli Studi di Pisa; Beatrice Garzelli, Università per Stranieri di Siena; Flavia Gherardi, Università degli Studi di Napoli, Federico II; Jesús González Maestro, Universidade de Vigo; Carlos M. Gutiérrez, University of Cincinnati; Lía Schwartz, Graduate Center of New York e Manuel Ángel Candelas Colodrón, Universidade de Vigo.

No transcurso do congreso presentaranse as conclusión dalgunhas das liñas de traballo destes especialistas, como por exemplo a edición crítica da obra dun autor sardo, José Delitala y Castelví, que segundo os expertos Candelas e Gherardi “imitaba a Quevedo”.

Tamén esta tarde se presentará un cancioneiro inédito que está na Biblioteca Nacional de Nápoles, cuxo autor “cremos que pode ser o mesmo Delitala”, segundo Candelas, que explica que nese texto hai poemas que teñen que ver con Quevedo e unha relación directa co autor español.

ÚLTIMAS

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...

Poñen marcha un servizo de aluguer de bicis eléctricas en Vigo, dispoñibles en sete aparcadoiros da cidade

A compañía Welgood puxo en marcha un servizo de aluguer de bicicletas eléctricas en...