As dúbidas expostas polos membros do Consello de Administración sobre cal é a lexislación ou criterio que deben acatar para pronunciarse sobre o futuro dos terreos onde se asenta o estaleiro Vulcano de Vigo, levaron á presidencia do Porto a solicitar que se remita a controversia ao Tribunal de Conflitos Xurisdicionais.
Así o confirmaron desde a Autoridade Portuaria viguesa, que preside Enrique López Veiga, e á vista de que algúns conselleiros manifestaron os seus reparos por ter que pronunciarse sobre a extinción da concesión dos terreos, xa que, mentres que un ditame do Consello de Estado determina que dita concesión quedou extinguida cando se disolveu a sociedade (o estaleiro Vulcano está en fase de liquidación), os tribunais consideran que dita concesión segue en vigor e, por tanto, debe formar parte dos bens que se liquidan.
O Consello do Porto tiña que votar a declaración de extinción da concesión a finais de xullo, pero aprazouse dita votación porque os conselleiros solicitaron máis tempo para estudar o ditame e avaliar o seu posicionamento. Nos últimos días, varios deles trasladaron as súas dúbidas “moi razoables” de que poidan votar de forma responsable e “con pleno coñecemento”, ao haber disparidade de criterios entre o Consello de Estado e os tribunais.
Por iso, o Porto solicitou ao Ministerio de Transportes, Mobilidade e Axenda Urbana que expoña o caso ante o Tribunal de Conflitos de Xurisdición para aclarar cal é o procedemento que se debe seguir con respecto á extinción desa concesión.
Por outra banda, hai que lembrar que a sociedade Marina Meridional foi a única que fixo unha oferta polas instalacións de Vulcano (7,8 millóns) e o xulgado mercantil deu de prazo ata o 22 de setembro para que se deposite ese diñeiro. Con todo, o administrador da empresa, José Alberto Barreras, xa expresou a súa reticencia sobre facer o depósito sen ter garantías de que a concesión seguirá en vigor, polo menos ata 2027 (o último prazo da prórroga que tiña Vulcano).
NOVA CONCESIÓN
Mentres, o presidente do Porto de Vigo segue defendendo que debe considerarse extinguida a concesión e que os terreos de dominio público deben retornar ao Porto libres de cargas. Ademais, López Veiga propuxo adquirir os terreos privados que forman parte de Vulcano para ampliar ese espazo e sacalo de novo a concurso, para outorgar unha concesión por un máximo de 50 anos.
Así, o Porto defendeu que esta opción achegaría seguridade xurídica aos posibles investidores interesados, e sinalou que a futura concesión non exclúe ningún sector de actividade, aínda que apostaría “de forma preferente e fundamental polo naval”.
