Miles de viguesas secundaron a folga deste 8 de Marzo, Día Internacional da Muller Traballadora, para reivindicar a igualdade de oportunidades nas condicións de traballo, na esfera social e o dereito a vivir sen violencia, sendo esta unha folga que traspasa o ámbito laboral, afectando ao ensino, ao consumo e aos coidados. Segundo a Policía Local, máis de 100.000 persoas manifestáronse nas rúas, sendo a concentración más masiva en Galicia.
Nos sectores máis precarizados e feminizados da Administración, como son os centros dependentes do Consorcio Galego de Servizos de Igualdade e Benestar (residencias de maiores, centros de día e escolas Galiña Azul), o paro é masivo en Galicia e un éxito rotundo, cinguíndose exclusivamente a cubrir os servizos mínimos impostos polo Goberno galego.
As traballadoras de ambulancias, que están na terceira semana de folga por un convenio colectivo digno, salientan desde a CIG, tamén se sumaron nesta xornada á folga de mulleres, reivindicando o seu traballo nun sector profundamente masculinizado.
Na comarca de Vigo a folga tivo un elevado seguimento. A limpeza do hospital Álvaro Cunqueiro viuse afectada a causa do paro de 24 horas, como tamén o servizo de cociña do centro médico vigués. Ao igual que a recollida do lixo (que xestiona a empresa FCC) e o mantemento dos parques e xardíns (do que se encarga Althenia).
No sector industrial hai que salientar a incidencia en empresas como Denso, GKN, Alonarti, Marsan, BorgWarner, Plastic Omnium, Asientos de Galicia, Viza, Alymosa, TRW, Domiberia ou Carchidea. Destacábel o seguimento da folga entre as traballadoras de Copo Galicia, tanto na quenda de noite como na da mañá.
Outras empresas nas que está a ter impacto son algunhas de alimentación como Frigolouro, Cerqueira, Valcárcel, Orbe, Fandicosta, Mascato ou Conservas Rías Baixas e do téxtil como Bimba y Lola, Pili Carrera, Paz Rodríguez e Selmark. De igual xeito, rexístrase un elevado seguimento en empresas importantes do sector dos centros de chamadas como Bosch e Unísono.
Por último, empresas do transporte como Gefco ou Vitrasa tamén rexistran un importante seguimento.
Máis alá de porcentaxes, a secretaria de Mulleres da CIG, Margarida Corral, destaca que “o verdadeiro éxito desta convocatoria reside en que “as mulleres fomos quen de pór no centro dos debates as discriminacións e as violencias que sufrimos polo mero feito de sermos mulleres, ou a necesidade de que os coidados sexan asumidos como unha problemática que se debe abordar desde as institucións, sen depositar en nós a súa responsabilidade”. E advertiu que “non imos permitir máis conmemoración hipócritas e baleiras de contido, que facemos folga para que o poder entenda que non imos de farol nas nosas demandas”.
de día… e tamén de noite
por unha sociedade máis igualitaria
