A presidenta do PP de Vigo, Luisa Sánchez, reprochou ao alcalde, Abel Caballero, o seu suposto “desexo de expulsar á Xunta” da cidade ao excluír ao Goberno galego da firma pública do convenio a tres bandas para desenvolver a antiga Escola de Transmisións e Electrónica da Armada (ETEA). A crítica chega despois de que Concello e Zona Franca convocasen aos medios para a sinatura dun acordo que permitirá executar a urbanización do principal viario da ETEA e un aparcadoiro subterráneo, un proxecto que, segundo os populares, financia integramente a Xunta a pesar de que os terreos son municipais.
O Executivo autonómico xa asinara o convenio días atrás, pero non foi convidado ao acto público previsto para este mércores. Segundo a portavoz municipal do PP, esta situación evidencia unha “deslealdade institucional” co obxectivo de que Caballero “faga crer á cidade que promove esta mellora en Teis, cando é a Xunta quen a sufraga”. Sánchez criticou que o alcalde, que no pasado rexeitaba “paripés” ou “firmas ilegais”, “agora está disposto a facerse unha foto por unha actuación na que o Concello non pon un euro”.
A líder popular lembrou que a Xunta investirá uns 10,5 millóns de euros para acondicionar o viario principal, a praza de Armas e as novas redes de servizos e conexións exteriores da contorna. Ao seu xuízo, Vigo “leva anos esperando” que o Concello permita avanzar en proxectos desta envergadura. Finalmente, Luisa Sánchez acusou ao rexedor de bloquear iniciativas clave na cidade, citando actuacións como o Centro de Asociacionismo, as pistas de atletismo de Balaídos, o túnel de Elduayen ou a sinalización do Camiño da Costa, e asegurou que “o alcalde é o único impedimento para que moitos proxectos saian adiante en Vigo”.
