O alcalde anunciou este luns a súa intención de recuperar a fachada de pedra da antiga estación de tren de Vigo -desmontada nos oitenta e almacenada en Redondela- para emprazala xunto ao acceso á nova estación do AVE de Urzáiz, deseñada por Thom Mayne. O arquitecto estadounidense visitou pola mañá a cidade, e Abel Caballero referiuse a el como un “xenio da arquitectura”.
Abel Caballero considera que é o “momento da recuperación dunha parte da historia da cidade” e propón a Thom Mayne que a fachada de pedra da antiga terminal se reproduza xunto ao muro da Praza da Estación, ao lado da que será a nova entrada ao inmoble ferroviario deseñado polo premiado arquitecto.
“Queremos recuperar unha parte da nosa memoria”, explicou o alcalde, quen manifestou que tiña unha “gran expectativa” na visita á cidade de Thom Mayne, unha década despois da última.
a expresividade dun mestre arquitecto
Caballero asegura que a futura estación do AVE de Vigo, pola “categoría e calidade” do arquitecto e por ser lugar de “encontro cidadá”, se converterá nunha “peza mestra da historia da arquitectura de Vigo” que estará “á altura dos mellores edificios desta cidade”. Na xuntanza cos medios, foi máis aló e ubicou ao proxecto entre os maiores da historia da humanidade.
