A alpinista galega Chus Lago lidera unha expedición ao Lago Baikal co obxectivo de concienciar sobre a importancia das rexións polares e as consecuencias do cambio climático, tal e como anunciou ante os medios esta mañá de martes en Vigo.
Esta aventura enmárcase dentro do proxecto “Compromiso con la Terra”, un proxecto ideado pola propia Chus Lago que aspira a completar 1.500 km de travesía sobre xeo en distintas fases.
É a terceira viaxe deste proxecto, despois de Laponia en 2016 (200 km.) e o casquete polar de Barnes, Canadá, en 2017 (190 km.). Nesta ocasión, atravesarán o Lago Baikal, situado en Siberia, nunha travesía de 700 km.
A data de saída da expedición está prevista para este luns, 28 de xaneiro. Xunto a Chus Lago, viaxarán outras dúas deportistas de recoñecida traxectoria: Verónica Romero, atleta de Mos que xa participou nas dúas anteriores expedicións de “Compromiso con la tierra” e Rocío García, cardióloga e montañista.
A terceira expedición de “Compromiso coa terra” percorrerá o Lago Baikal, que, como explicou Chus Lago, trátase do lago máis antigo do planeta. O equipo converterase na primeira expedición integrada unicamente por mulleres en atravesar este xigantesco lago ruso.
Ademais de pola súa lonxevidade, Baikal sobresae polas súas dimensións (máis de 600 km de longo) e por ser o lago máis profundo da terra, chegando aos 1.642 m. Todo iso, converten ao lago siberiano na maior reserva mundial de auga doce, contendo o 20% da auga non conxelada da que dispoñemos, de aí a importancia da súa conservación.
Apoiada en datos científicos, Chus Lago explicou que a temperatura do Baikal elevouse 1,2º no último século (o dobre da subida de temperatura a nivel global) o que provoca que a súa superficie se conxele agora 18 días menos ao ano que fai tan só 150 anos. Ademais, a desaparición paulatina do permafrost provoca que aumenten as emisións de metano do lago á atmosfera, provenientes das fontes termais.
As tres montañeiras cruzarán o lago de sur a norte, percorrendo preto de 700 km durante uns 25 días, aínda que o tempo exacto dependerá das condicións climatolóxicas “en especial o forte vento” e do estado do permafrost, a capa de xeo que cobre o lago e sobre a que camiñarán.
As tres mulleres desprazaranse durante as 8 horas de luz solar diarias, arrastrando trineos duns 70 quilos, e farano utilizando diferentes métodos como esquís, crampones e patíns. A travesía conta coa dificultade de realizarse sen paradas para avituallarse ou pernoitar, durmindo todas as noites sobre o xeo.
Sobrevivirán a temperaturas extremas, as tormentas, as roturas do xeo e o vento, polo que seremos testemuña dun reto montañeiro de primeira orde. Chus Lago resaltou que esta aventura non se podería levar a cabo sen o apoio dos seus patrocinadores, principalmente Vegalsa, así como Ternua (roupa), Julbo (lentes), Emwey e Colliseum (adestramentos), Terra e Mar (kaiaks), Olympus (equipo fotográfico), Montañeiros Celtas, Desiro e Argome (patíns) e Lalizas (chalecos salvavidas).
