O alcalde de Vigo, Abel Caballero, retomou este martes as críticas á Xunta de Galicia pola situación da estación de autobuses situada no complexo de Vialia. O rexedor atribúe ao Goberno autonómico a responsabilidade polo mantemento dunha terminal que, segundo denunciou, presenta deficiencias en distintos servizos e instalacións.

Nunhas declaracións remitidas aos medios, Caballero cualificou a situación da estación de “catástrofe” e enumerou problemas relacionados coa limpeza, a salubridade, o funcionamento dos aseos e a sinalización interior. O alcalde tamén volveu poñer o foco na presenza de persoas sen fogar que pasan a noite nas zonas de acceso e nos soportais próximos á terminal.

“Aquilo dá náuseas”, afirmou o rexedor, que sostivo que a Xunta “segue sen atender as súas obrigacións” nunha infraestrutura que definiu como “a súa estación”.

Caballero acusou ademais o Executivo galego de non adoptar as medidas necesarias para corrixir os problemas que denuncia. Na súa intervención chegou a afirmar que Vigo, á que se referiu como “a cidade máis importante de Galicia”, conta coa “estación de buses en peor situación de España”.

As críticas estendéronse tamén ao PP de Vigo, ao que reprochou que permaneza “calladito” ante o estado da terminal.

DISCREPANCIA SOBRE A ATENCIÓN A PERSOAS SEN FOGAR

Un dos principais puntos de conflito entre as administracións está na situación das persoas vulnerables que durmen de maneira habitual nos accesos da estación.

Segundo Caballero, a competencia para ofrecer unha solución habitacional ás persoas sen teito corresponde á Xunta de Galicia. O alcalde considera que o Goberno autonómico está actuando “coma se non fóra con eles” e acusouno de falta de implicación ante esta problemática.

“Encántalles que a Vigo as cousas non lle vaian ben”, chegou a sinalar o rexedor durante as súas críticas ao Executivo galego.

A Xunta, pola súa banda, mantén unha interpretación diferente sobre o reparto de responsabilidades. Tras unha reunión celebrada hai unha semana entre representantes municipais e autonómicos, o Goberno galego anunciou a súa intención de coordinar co Concello de Vigo e coa Delegación do Goberno medidas para reforzar a seguridade na terminal.

Entre as actuacións anunciadas figura a instalación dun peche provisional nos soportais nos que pasan a noite persoas en situación de vulnerabilidade.

Ao mesmo tempo, a Administración autonómica lembrou entón que a atención inmediata ás persoas sen fogar corresponde á administración local, unha consideración que entra en conflito coa posición expresada polo alcalde vigués.