A Xunta de Galicia solicitou ao Concello de Vigo que adopte medidas correctoras despois de detectarse concentracións elevadas de chumbo na auga da traída en varias mostras recollidas na parroquia de Beade, na contorna dun instituto da zona. A Administración autonómica precisou, con todo, que as instalacións de subministración do centro educativo están en bo estado.

A situación foi comunicada inicialmente polo propio Concello, a través do Consello Municipal Escolar, que alertou á Xunta da presenza de chumbo en valores superiores aos habituais na auga do instituto. Segundo se trasladou, as medicións posteriores volveron a niveis normais, aínda que a comunidade educativa continúa a consumir auga embotellada por precaución.

O pasado luns, técnicos de Saúde Pública recolleron mostras en catro puntos exteriores ao centro: tres acometidas de vivendas e un punto da rede de abastecemento. As análises revelaron que dous dos puntos máis afastados do instituto presentaban concentracións de chumbo, así como doutros metais como ferro, aluminio e arsénico.

Nas últimas horas realizouse unha visita técnica ao instituto coa presenza do director territorial de Educación, César Pérez Ares, da responsable da Unidade Técnica de Educación, membros da dirección do centro e un representante da empresa concesionaria. A inspección permitiu comprobar que todas as tubaxes desde o contador da fachada ata o interior son de polietileno, polo que non existirían elementos con chumbo no circuíto interno.

Neste contexto, Pérez Ares sinalou que a presenza detectada “só pode deberse ao arrastre desde as acometidas exteriores” e advertiu de que “non serve de nada que teñamos todas as instalacións perfectas no interior, con polietileno, cando existe un arrastre de chumbo desde as tubaxes municipais exteriores cara ao interior”. O responsable educativo reclamou ao Concello “medidas correctoras para evitar problemas no consumo de auga”.

Para evitar confusións, a Xunta propuxo que o Concello leve a cabo catas co obxectivo de localizar posibles tubaxes de chumbo na rede municipal que estarían a provocar os episodios detectados. Os resultados das análises, realizadas polos farmacéuticos de Saúde Pública, xa foron **trasladados ao Concello e á concesionaria Aqualia, segundo confirmou a Administración autonómica.