A sección quinta da Audiencia Provincial de Pontevedra, con sede en Vigo, celebrará o día 4 un xuízo por un delito de agresión sexual e outro de roubo con violencia contra o que se xulga a un home, para o que Fiscalía pide penas que suman 11 anos de cárcere.

Os feitos, segundo recolle o escrito de cualificación fiscal, producíronse na madrugada do 29 de maio de 2022 cando o procesado, nunha rúa de Vigo, convidou á vítima a consumir unha dose de cocaína para que o acompañase aos baños do aparcadoiro público existente na zona.

Unha vez no interior, pechou a porta e agarrou o pelo da vítima, da que tentou que lle realizase unha felación aínda que sen conseguilo pola oposición desta persoa. Posteriormente, empuxouna contra a parede, agarrouna con forza e consumou a agresión sexual “de forma brusca en varias ocasións”. Posteriormente, colleu o móbil que a vítima levaba nun bolsilo e marchou rapidamente do lugar. Con motivo da súa detención, o teléfono foi recuperado.

Fiscalía considera os feitos constitutivos dun delito de agresión sexual con penetración polo que pide nove anos de cárcere e outro de roubo con violencia polo que solicita outros dous anos. Tamén debe indemnizar á vítima con dez mil euros por dano moral.