O BNG de Vigo pediu unha reforma do regulamento de honras e distincións do Concello olívico fronte ao “secuestro” e as “imposicións sectarias” dos recoñecementos institucionais por parte do alcalde, Abel Caballero.
Así o sinalou nun comunicado o portavoz municipal do Bloque, Xabier Pérez Igrexas, que solicitou que se recuperen os mecanismos de consenso ante as “imposicións sectarias” do rexedor, “que un ano máis anunciou a Medalla da Cidade e Vigueses Distinguidos de forma unilateral”.
“Os recoñecementos e distincións do Concello non poden seguir sendo a medalla do ‘aquí mando eu’ e Abel Caballero ten que respectar a pluralidade e a diversidade da cidade, que non cabe nas estreitas costuras da súa conxuntural maioría absoluta no pleno”, criticou Igrexas.
Todo iso despois de que o alcalde anunciase nos últimos días distintas distincións para este 2025, como a Asociación de Dano Cerebral Alento, que será Viguesa Distinguida, así como o quen fose presidente do Banco de Alimentos Iván Martínez, a título póstumo. Tamén a Cooperativa de Armadores de Pesca do Porto de Vigo (ARVI) recibirá a Medalla da Cidade.
