O Consello de Ministros aprobou este martes a modificación puntual ao Plan de Desenvolvemento da Rede de Transporte de Enerxía Eléctrica no horizonte 2026, para ampliar o número de actuacións, entre as que se inclúe a conexión de Stellantis Vigo á denominada rede de moi alta tensión.

O plan incluirá un total de 73 actuacións, cun investimento asociado de 489 millóns de euros, destinadas a facilitar a materialización de proxectos estratéxicos para a descarbonización da industria, a produción de hidróxeno, a integración de enerxía renovable, ou o apoio á cadea de materiais e tecnoloxías crave vinculadas á transición ecolóxica.

De acordo co establecido pola Lei 24/2013 do sector eléctrico, as actuacións aprobadas na modificación puntual teñen carácter excepcional e responden a supostos moi restrinxidos, como atender a necesidades urxentes relacionadas coa seguridade de subministración ou permitir a viabilidade de instalacións críticas para a transición enerxética e a electrificación da economía.

A tramitación da modificación iniciouse o pasado mes de decembro, cunha proposta que foi informada as comunidades autónomas e a Comisión Nacional dos Mercados e a Competencia. Nesa modificación inclúese o chamado proxecto Novo Vigo 220kv, cun custo de 72 millóns de euros, que se xustifica pola necesidade que existe na área de Vigo de abastecemento dunha demanda asociada á transición enerxética directamente desde a rede de transporte eléctrica (xa que o nivel de demanda excede os 50MW).

Como solución proponse unha nova subestación, SE 220kv Novo Vigo, como entrada-saída da liña Atios-Pazos de Borbén 220kv.

Fontes do Ministerio para a Transición Ecolóxica e o Reto Demográfico sinalaron que as actuacións incluídas na modificación aprobada este martes publicaranse no BOE e “as capacidades dispoñibles nos nós correspondentes coñeceranse no momento en que Rede Eléctrica as publique na súa plataforma, o primeiro día do mes seguinte”.

A conexión á chamada moi alta tensión é unha demanda da planta viguesa de Stellantis, para evitar microcortes e problemas na subministración eléctrica que afectan á súa produción. De feito, a principios deste ano, o director da factoría, Ignacio Bueno, urxía que se axilizasen os trámites porque esa conexión é necesaria “para a supervivencia da fábrica”.

Nese sentido, lembrou que as previsións de descarbonización da planta requiren máis consumo eléctrico e, sen a moi alta tensión, Stellantis Vigo “tería problemas”. Fontes da empresa consultadas por Europa Press trasladaron a súa satisfacción polo acordo do Consello de Ministros deste martes.