Un mozo, I.B.G. de 19 anos de idade, foi detido en Vigo tras dar unha puñada na cara a outro home e romperlle un dente durante unha liorta ocorrida na rúa Inés Pérez de Ceta. En concreto, os feitos tiveron lugar sobre as 06.30 horas do pasado venres, día 22 de marzo. Segundo informa a Policía Local, tívose constancia do sucedido a través da chamada dun particular, que alertaba de que se estaba producindo un enfrontamento entre varios mozos na zona.
Unha vez no punto, os axentes comprobaron que unha das dez persoas se atopaban discutindo acaloradamente, polo que trataron de dispersalos. No entanto, dous deles continuaron coa súa actitude, mantendo un elevado estado de agresividade. Nun momento dado, o agora detido deulle unha puñada ao outro home, fracturándolle un dente. Tras iso, tentou fuxir, sendo interceptado polos actuantes.
Así, deuse aviso aos servizos sanitarios para que atendesen a ambos os mozos, xa que o agresor tamén presentaba contusións na cabeza e extremidades. Despois, foi detido como presunto autor dun delito de lesións.
