Máis de 30 marcas de coches e 15 de motocicletas reuniranse na 33ª edición do Salón do Automóbil e a Motocicleta de Vigo, que arrincará este mércores, día 6 de marzo, no instituto feiral da cidade olívica (Ifevi), onde permanecerá aberto ata o domingo 10.

Tal como reivindicou a organización, cuns 20.000 metros cadrados de exposición, trátase do evento con maior exposición comercial de motor en Galicia, na que se reunirán os principais concesionarios da comarca para mostrar unha “gran variedade de marcas e ofrecer propostas de todo tipo de vehículos de diferentes rangos de prezos”.

“Desde os últimos modelos eléctricos ou híbridos á tradicionais gasolina ou diésel, o Salón do Automóbil e a Motocicleta de Vigo preséntase como a oportunidade perfecta para escoller a mellor opción”, reivindicaron.

Entre as novidades, a firma chinesa Omoda presentarase por primeira vez en España no salón, co seu Omoda 5, un todocamiño con motor gasolina.

Á presentación do evento acudiu, entre outros, a delegada da Xunta en Vigo, Ana Ortiz, quen destacou o Salón como “referencia da fortaleza do sector automobilístico” da cidade.