O grupo municipal do PP no Concello de Vigo designou a Miguel Martín como novo portavoz, tras a saída de Marta Fernández-Tapias. O concelleiro, que xa era portavoz adxunto do grupo, trasladou o seu agradecemento pola confianza depositada nel e avanzou que o seu obxectivo á fronte do grupo ‘popular’ será a “fiscalización constante” do goberno municipal da cidade, que cualificou como o “imperio menguante” de Abel Caballero.

Xornalista de profesión, Miguel Martín sinalou que traballará pola construción dunha “alternativa firme e real” ao proxecto do goberno socialista local.

O novo portavoz municipal do PP en Vigo estreouse en política como candidato número 5 na lista liderada por Fernández-Tapias para as eleccións municipais de 2023. Agora substitúea como portavoz municipal, despois da saída de Tapias, que abandonou a política tras os comicios galegos do pasado 18 de febreiro, deixando, ademais da portavocía e a acta de concelleira, o seu posto como vicepresidenta da Deputación e tamén a presidencia do PP de Vigo.

Miguel Martín quixo ter palabras de recoñecemento para a súa antecesora, de quen destacou que conseguiu “revitalizar” o PP vigués e deu un impulso ao grupo municipal.